KRUJË– Operacion antidrogë në Krujë. Raportohet se në kuadër të operacionit të koduar “Territor i pastër” këtë të martë janë zbuluar dhe asgjesuar me anë të djegies 875 bimë kanabis të mbjella në terren malor. Ashtu si dhe në operacionet e tjera nuk ka asnjë autor të dyshuar në pranga. Me sa duket operacionet policore deri më tani kanë pasur efekt zbulumi por jo dërgimi para drejtësisë të autorëve. Dhe në rastet kur kemi pasur arrestime kanë qenë në nivelin e kryeplakut të fshatit apo specialistëve të pyjores.
NJOFTIMI I POLICISË:
Krujë/Vijojnë kontrollet për goditjen e veprimtarisë kriminale të kultivimit të bimëve narkotike. Finalizohet nga Komisariati i Policisë Krujë, faza e 28-të e megaoperacionit policor antikanabis të koduar “Territor i pastër”. Gjatë kësaj faze u asgjësuan nëpërmjet djegies 875 bimë narkotike cannabis sativa që u gjetën të kultivuara në terren malor, në një fshat të Krujës. Më parë, si rezultat i fazave të tjera të këtij operacioni, janë asgjësuar 14 965 bimë narkotike kanabis. Shërbimet e Komisariatit të Policisë Krujë kanë vijuar kontrollet në zonat malore të Krujës, duke përdorur dhe dronë, me qëllim parandalimin, evidentimin dhe goditjen e veprimtarisë kriminale të kultivimit të bimëve narkotike. Nga këto kontrolle, gjatë fazës së 28-të të megaoperacionit “Territor i pastër”, në fshatin Cudhi Kamp, në Krujë, u gjetën të kultivuara 875 bimë të dyshuara narkotike cannabis sativa, të cilat u asgjësuan me anë të djegies. Strukturat hetimore, në bashkëpunim me Prokurorinë, vijojnë punën për identifikimin dhe kapjen e autorëve të kultivimit të bimëve narkotike. Operacioni i kontrollit të territorit vijon.
