TIRANË– “Çështja është në dorën e drejtësisë“, kështu e ka argumentuar nënkryetari i grupit parlamentar i Partisë Socialiste Toni Gogu rrëzimin e kërkëses së deputetëve të Partisë Demokratike për interpelancë me kryeministrin Edi Rama në seancën e së enjetes për aferën e inceneratorëve dhe dosjen “Ahmetaj”. Sipas Gogut nuk ka asgjë urgjente dhe se çështja e inceneratorëve i ka kaluar tashmë drejtësisë.
Toni Gogu: Kryetarja e Kuvendit në zbatim të rregullores e nxitur nga një kërkesë e pakicës së pakicës për një mocion me debat ku ishte shtuar dhe fjala ‘urgjente’, u thërrit Konferenca dhe i kërkoi mendim për ta bashkuar dhe me një tjetër kërkesë, për interpelancë po urgjente. Kërkonin për të diskutuar çështjen e inceneratorëve. Ne i dhamë pëlqimin kryetares që meqë çështjet janë të ngjashme për tu bashkuar, por nuk dhamë pëlqimin që çështjet urgjente për t’u futur në Kuvend. Në sesionin e të enjtes, do të vendosë Kuvendi nëse ato çështje do të përfshihen në rendin e ditës apo jo. Ne besojmë se aty nuk ka përmbajtje, tani është momenti i drejtësisë për atë çështje. Ne e kemi hapur rrugën kur ishte rasti urgjent dhe hapëm rrugën e SPAK.
