TIRANË– Kryetari i Partisë Demokratike Sali Berisha ka kërkuar prezencën e kryeministrit Edi Rama në seancën e kësaj të enjteje në Kuvend. Sipas tij Kuvendi i mbyll punimet e sesionit me “faqe të zezë” për shkak të aferës së inceneratorëve dhe arratisjes së ish-zëvendëskryeministrit Arben Ahmetaj. Ai u ndal dhe tek çështje të tjera të cilat prodhuan debat.
Sali Berisha: Kushtetuta e parlamentit thotë në mënyrë tekstuale, se një ligj nuk mund të hyjë në rend dite pa kalaur 48 orë. Ti kryen një shkelje të rëndë ligjore të barabartë me banditët Rraja që rrihni qytetarët me shkopa bejsbolli. Si mund ti lejosh vetes ti, një gjë të tillë. Nëse ju doni të bëni këtë gjë, ndryshoni rregulloren e parlamentit me procedurën e saj, dhe pastaj zbatoni marrëveshjen Rama-Doshi, Doshi-Rama dhe Gjinushi. Por ky është i turpshëm, është një akt i turpshëm kjo që bëni. Ky është një provokim i ulët, një shkelmim i ligjeve. Kur kryetarja e parlamentit që duhet të jetë mbrojtëse, zbatuese kryesore e rregullores, apo kushtetutës së parlamentit e shkelmon atë me dy këmbët, për interesat e Skënder Gjinushit, Tom Doshit dhe Edi Ramës, ky është fundi i këtij parlamenti.
