BERAT– Policia e Beratit ka vënë në pranga këtë të dielë shoferin e kamionit pas vdekjes së punonjësit turk gjatë punës. Osman Akçay u zu poshtë nga çisterna, e cila rrëshqiti nga mjeti gjatë ngjitjes në malore. Hetimet e Policisë vazhdojnë ndërsa trupi i pajetë është nisur drejt Institutit të Mjekësisë Ligjore në Tiranë.
NJOFTIMI I POLICISË:
Specialistët për Hetimin e Krimeve të Komisariatit të Policisë Skrapar arrestuan në flagrancë për veprën penale “Shkelja e rregullave të mbrojtjes në punë”, shtetasin A. B., 45 vjeç, banues në Çorovodë, Skrapar, me detyrë shofer kamioni, pranë një firme të përpunimit të mermerit në fshatin Zaloshnje, Skrapar, pasi mbrëmjen e djeshme duke transportuar ujë me një çisterno të cilën e kishte vendosur në karrocerinë e kamionit që drejtonte, çisterna ka rrëshqitur nga karroceria dhe ka përplasur shtetasin O.A., 60 vjeç, (shtetas turk), i cili ka ndërruar jetë.
