TIRANË– “Nëse deri para pak kohësh i kam vënë synim vetes që do jem e mbyllur ndaj lidhjeve të dashurisë, se kam pasur muret e mia, kam ca kohë që i kam thënë Diolës që duhet të jesh më e hapur. Jam treguar shumë e ashpër me veten.” Një deklaratë e tillë u bë nga nutricionistja Diola Dosti, në emisionin “Stay Tuned” me moderatoren Valbona Mhilli në MCN Tv, ku nëna e tre vajzave nga një martesë e përfunduar, e lë të hapur mundësinë që t’i rrahë zemra sërish. Ajo thotë se sfidat e kanë bërë më të bukur, madje shton se dhimbja është normale.
“Dhimbja është normale dhe duhet për tu rritur, por vuajtja nuk është normale. Kam zgjedhur që kur kam dhimbje është ok, se Zoti na e sjell dhimbjen për tu rritur, të vuash apo jo është çështje zgjedhje pastaj. Por unë kam zgjedhur të mos vuaj se them vuajtja më shkakton rrudha, e di si ma ndryshon biokiminë vuajtja se e kam përjetuar në disa momente. Nuk jam penduar për asgjë do kisha bërë të njëjtat zgjedhje, edhe nëse do e kisha jetën nga fillimi, se çdo gjë që ne na ndodh na ndodh për arsye për tu rritur dhe për tu bërë një njeri më i mirë nga sa ishim dje. Në gjithë historinë time, se jam 35 vjeç, të gjithë njerëzit që janë munduar të më bëjnë keq, mund të jenë përpjekur të më bëjnë gropën mua, kanë pasur një karma aq të keqe. Unë nuk i hakmerrem askujt, mund të kem pasur në dorë që t’ia kthej shumë keq, por nuk është kjo rruga ime. Madje dua ta mbyll me shprehjen time të preferuar: Shumë njerëz u përpoqën, bënë çmos për të më varrosur por harruan që unë isha farë.”
