TIRANË– Një përfaqësi e studentëve të Mjekësisë të cilët kundërshtojnë ligjin e qeverisë që i detyron të qëndrojnë 5 vite pas diplomimit të Shqipërisë kanë zhvilluar këtë të martë një takim me Presidentin e vendit Bajram Begaj. Nga ky i fundit ata kanë kërkuar mosdekretimin e ligjit për kushtëzimin e diplomave. Në një prononcim për mediat studentët thanë se kanë paraqitur tek Kreu i Shtetit zgjidhjet e tyre, dhe presin nga ai që të marrë një vendim në përputhje me Kushtetutën.
Studenti 1: Sigurisht ne i shprehëm shqetësimet tona, presidenti na dëgjoi bashkë me këshilltarët e tij. Shprehu edhe ai qëndrimin e tij, ku do të shqyrtojë këtë projektligji, tashmë ligj dhe do të pritet se si do të jetë reagimi. Ne shkuam në takim si një përfaqësi e studentëve të Mjekësisë. Çfarë qëndrimi do të mbahet, nuk mund të flasim në këtë moment. Në tetor nuk hyjmë në auditore.
Studenti 2: Ideja është se kërkesa që ne kemi bërë për presidentin, mikpritja ka qenë shumë pozitive. Përqasja ishte pozitive. Presidenti na dëgjoi me vëmendje, të gjitha problematikat tona. Kemi dhënë zgjedhjet tona dhe presim një përgjigje nga presidenti për të mos dekretuar ligjin. Ai tha që gjithçka do të jetë e bazuar në Kushtetutë dhe në sugjerimet tona.
