Nga Edon KUQI
Asambleja e Partisë Socialiste ka shkaktuar “furtunë” këtë të mërkurë në radhët e socialistëve të cilët nuk e prisnin largimin e Damian Gjiknurit nga çdo post politik, zërat thonë se ai u lëshua nga Rama pas Arben Ahmetajt, i cili u arratis nga drejtësia.
Arsyet që çuan në shkarkimin e Gjiknurit mbetën ende të paqarta zyrtarisht por s’ka asnjë dyshim që kjo erdhi pas emri i tij doli në aferën e inceneratorëve, aferë që deri më tani ka ngrënë “koka” ish-ministrash e zyrtarësh, madje dhe atë të ish-zëvendëskryeministrit.
Arsyet politike në shkarkimin e Gjiknurit nuk qëndrojnë. Në zgjedhjet e 14 majit ai ia doli që të “rrëmbejë” fitoren në të gjitha bashkitë e qarkut duke u trumbetuar si fitimtar i madh, por jo “miza fshihet nën kësulë”.
Ky ishte mesazh i qartë se Edi Rama lëshoi “besnikun” e radhës. U nis me vrull të madh për të reformuar qeverinë e shkërmoqur nga skandalet por u mjaftua me shkarkime sekretarësh dhe emërimesh të reja, me emra të vjetër.
Bledi Çuçi dhe Taulant Balla shkëmbyen postet për të mbuluar skandalin e Rrajave, Balla mori postin që priste prej kohësh ndërsa Çuçit dukej qartë se kostumi i ministrit ishte paksa i madh për të. Lajmi se Delina Ibrahimaj u shkarkua më pas u mohua, pse hoqi dorë Rama nga shkarkimi i saj apo mos vallë ai nuk pranoi dorëheqjen e dorëzuar prej javësh nga ajo.
Asambleja e sotme nuk prodhoi asgjë të re përveçse rifreskimin e figarave të vjetra, “lëshimin” e disave dhe dhënien e një cope të vogël tortë disa të tjerëve. A do ketë “kurbanë” nga radhët e ministrave në dy ditët e ardhshme mbetet për tu parë, ministrat s’po e bëjnë gjumin e qetë ndërsa socialistët presin të zëvendësojnë rilindasit që pavarësisht ‘fortunave’ mbeten ‘besnikët’ e pandarë të Edi Ramës, deri kur t’u vijë radha.Newszone
