TIRANË– Presidenti i Shteteve të Bashkuara të Amerikës Joe Biden përmes një video-mesazhi ka përshëndetur 101-vjetorin e marrëdhënieve diplomatike mes Shqipërisë dhe SHBA-ve. Biden shprehet se uron më shumë vite të tjera miqësie dhe bashkëpunimi me vendin tonë. Në video-mesazhin e shpërndarë nga Ambasada e SHBA-ve në Tiranë janë disa nga momentet historike të raporteve mes dy vendeve.
REAGIMI:
Sot është 101-vjetori i vendosjes zyrtare të marrëdhënieve diplomatike mes Shteteve të Bashkuara dhe Shqipërisë. Lidhjet zyrtare diplomatike mes vendeve tona filluan më 28 korrik 1922, menjëherë pas përfundimit të Konferencës së Paqes në Paris, ku Presidenti i SHBA Wilson qëndroi në krah të popullit shqiptar për pavarësinë dhe sovranitetin e tij. Vitin e kaluar, me rastin e 100-vjetorit të marrëdhënieve diplomatike, ne festuam miqësinë e ngushtë mes dy kombeve tona, duke theksuar aleancën e fortë strategjike mes Shteteve të Bashkuara dhe Shqipërisë. Presidenti i SHBA Joe Biden dërgoi një mesazh të veçantë shprese për bashkëpunim të vazhdueshëm dhe për një të ardhme edhe më të ndritshme për popullin shqiptar. Urojmë për më shumë vite të tjera miqësie dhe bashkëpunimi!
