Sekretari i marrëdhënieve ndërkombëtare në PD, Enri Ceno, i ftuar në ‘Stay Tuned’, në ,MCN TV, nga moderatorja Valbona Mhilli, ka folur më tepër rreth angazhimit të tij në politikë. Ceno tregon se u bashkua me PD për arsye tradite familjare, por PD në këto 30 vite nuk ka qenë aq e djathtë sa ai ka dashur.
“Vetë rezultati i së dielës në Rrogozhinë, 14 maji dhe përplasja brenda PD, tregon se në 30 vite është punuar mjaft keq dhe ka nevojë për ndryshim dhe që ndryshimi të vijë.
Duhet të vijë nëpërmjet një mendësie të re, e cila vjen nëpërmjet njerëzve të rinj.
Unë kam qenë për një bashkëpunim mes të vjetrës dhe të resë dhe kurrë një betejë mes gjeneratës së re dhe të vjetër që ne do vijmë me shpatë dhe mposhtim të vjetrën.
PD duhet të përftojë mes ideve të reja dhe eksperiencës, mendoj se në vjeshtë e djathta duhet të ketë një rikonceptim në vetvete.
PD duhet të rikonfigurojë vetveten ideologjikisht në radhë të parë me një frymë të re. Të gjithë e kanë mbështetur pas 2013 Lulzim Bashën por po rezulton me ideologji të vjetër. Humb zgjedhjet, hap krahun, vjen tjetri.
PD në këtë lloj konfiguracioni nuk duhet të quhet më PD, se kjo është një mendësi komuniste që unë nuk njoh vendime anëtarësie dhe votën e lirë, njoh vendime gjykatash.
Anëtarësia votoi masivisht kundër Lulzim Bashës. PD në datë 29 kur Luli të rizgjidhet duhet të ndryshojë emrin. Nuk është rikonfirmim, ai aty ka qenë gjithmonë, thjesht ka përdorur marionetat e tij për të gjitha vendimmarrjet.
Të gjitha vendimmarrjet e Lulit dhe marionetave të tij kanë qenë kundër demokratëve dhe shqiptarëve.
Në zgjedhjet e ardhshme kurdo që të jenë, Luli nuk do marrë më shumë se 3%, absolutisht që kjo e dëmton të djathtën.”
