FUSHË-KRUJË– Një sherr mes dy familjeve në fshatin Hamallas ka përfunduar në një përleshje të dhunshme fizike. Raportohet se Martin Nikolla së bashku me vëllezërit e tij i kanë zënë pritë dhe kanë goditur me shkopinj bejsbolli e mjete të forta familjen Kaçi me të cilët janë komshinj. Konkretisht Martin, Alfred, Petrit dhe Arben Nikolla i kanë zënë pritë 80-vjeçarit Pjetër Kaçi. Pasi i akën thënë pse na sheh kanë nisur ta godasin me sende të forta duke e gjakosur.
Në këtë moment kanë ndërhyrë djemtë e të moshuarit. Por dhe këta të fundit janë zënë ngusht nën goditjet e njëpasnjëshme të shkopave të bejsbollit, sendeve të forta dhe armëve të zjarrit. Në një moment Martin Nikolla ka nxjerrë pistoletën duke ja drejtuar familjes Kaçi e me të ka gjuajtur 5 herë në drejtim te tyre.
Mësohet se shkak i sherrit të rëndë që përfundoi me tre të plagosur njëri prej të cilëve rëndë janë konflikte të vazhdueshme për rrugën e lagjes të cilën banoret e kanë shtruar para 10 vitesh me lekët e tyre e disa rrethime të komshinjve që familja Nikolla kërkon t’i heqë pavarësisht se kanë nga 30 vjet që janë. Anëtarët e familjes Nikolli janë shoqëruar në Polici. Po hetohet ngjarja.
