FUSHË-KRUJË– Paulin Kaçi një prej anëtarëve të familjes së tij të dhunuar brutalisht këtë të dielë nga Martin Nikolla, shoferi i kryeparlamentares Lindita Nikolla, tashmë i përjashtuar nga garda ka folur për mediat ku ka treguar dinamikën e ngjarjes së rëndë. Kaçi ka treguar se në fillim Martin Nikolla së bashku me vëllezërit e tij i kanë ndaluar në rrugë babanë, 80 vjeç dhe kanë nisur ta rrahin. Në këtë moment kanë ndërhyrë ai dhe vëllezërit por dhe këta të fundit janë gjendur mes sulmit të shkopinjëve të bejsbollit dhe sendeve të forta. Në një moment Nikolla ka nxjerrë armën e shërbimit dhe ka qëlluar në ajër. Sipas Kaçit konfliktet me fisin Nikolla janë të shpeshta dhe se këta të fundit i ofendojnë babanë, nënën, nusen dhe kunatat sa herë kalojnë në rrugë.
Paulin Kaçi: Babai im ishte duke ardhur nga rruga dhe i kanë thënë pse sheh nga shtëpia ime. Kanë dalë para për me gjujt babanë, gjithë si vëllezërit. Kemi ardhur ne kemi bërë debat dhe ka nis dhuna me shkopinj. Me armë kanë shtënë drejt nesh katër apo pesë herë, fati ynë që s’na kanë kap. Ishte duke na vra Martin Nikolli, janë të fortë. Çështja ka qenë në prokurori për këtë rrugë, se më kalon ngjit me shtëpinë. Duan se s’bën me bo rrugën këtu dhe bëjnë të fortin, mos me pas as majtas as djathtas, veç drejt sipas tyre. Janë dikushi dhe kjo gjë ndodh këtu. Bëri katër a pesë muaj që kemi pas debate. Vetëm ne kemi si lagje, se vetëm ne jemi këtu afër. Sa herë të kalojnë në oborr të shtëpisë time, më ofendojnë babën, nënën, kunatë e të gjithë. Shteti e ka në dorë këtë gjë, se të shtijë një person në ajër me na vra, pesë 6 herë ka qëlluar. Ne kemi fëmijë, motra, kunata nëpër oborr të shtëpisë. I bëj thirrje Edi Ramës të merret me këtë çështje. Po përdorin armën e shtetit për të fortë. Skandal i gjallë. Kërkoj urdhër mbrojtje nga gjykata, ta zgjidhin këtë problem. Çdo herë vetëm konflikte me këta. Jo vetëm me ne, me me axhallarët, me halla. Ne s’jemi të gjithë të këqij. Institucionet të marrin masa për këtë çështje që të mos bëhet ndonjë gjë më e madhe që të marrë përshkallëzim.
