BERAT– Detaje të reja janë zbardhur në lidhje me plagosjen e një dite më parë në Berat, ku 27-vjeçari Xhuljano Goga u plagos me armë zjarri me silenciator sapo doli nga banesa e tij në Berat. Raportohet se këtë të hënë Policia po vëzhgon të gjitha kamerat e sigurisë afër banesës së të riut dhe përreth saj me qëllim kapjen e autorit të ngjarjes.
Ndërkohë i riu pasi i është nënshtruar një ndërhyrjeje kirugjikale në Berat është nisur drejt spitalit të Traumës ku po merr mjekim të specializuar për shkak të plagës së thellë të shkaktuar nga arma e zjarrit në këmbë. Ndërsa para Policisë, i riu ka “kyçyr” gojën dhe s’ka dhënë asnjë dëshmi sa i përket ndonjë autori të dyshuar apo rrethanave të ngjarjes. Në spital ai ka mbërritur me mjetin e tij i mbuluar nga gjaku.
Ai pritet të merret në pyetje sërish nga grupi hetimor i ngritur nga Policia e Beratit për hetimin e ngjarjes. Nuk dihet nëse sot ai do të vendosë të flasë me Policinë. Dëshmia e tij pritet të hedhë dritë mbi ngjarjen, e cila prej natë së mbrëmshme vijon të jetë e mbuluar me “mister”.
