TIRANË– Erjon Alibej, i arrestuar dhe akuzuar zyrtarisht nga Prokuroria e Posaçme Kundër Korrupsionit dhe Krimit të Organizuar (SPAK) për porositjen e të paktën dy vrasjeve, atë të Emiljano Ramazanit dhe Regis Runajt, ka vendosur të rrëfehet! Përpara tre prokurorëve që po ndjekin hetimet e operacionit “Plumbi i Artë”, Alibej është kthyer në të penduarin e 5-të brenda viteve të fundit për SPAK, pas Klevis Allës, Euglent Halilit, Nuredin Dumanit e Henrik Hoxhës, por ende jo zyrtarisht. Kjo pasi, Alibej ka zbërthyer disa ngjarje kriminale, ku është përfshirë edhe vetë, por dëshmia e tij pritet të ballafaqohet me atë të të penduarve të tjerë dhe me faktet që aktualisht prokurorët kanë në dorë.
Nëse kjo ndodh, rrëfimi i Alibejt mund të djellë organizimin e operacionit “Plumbi i artë 1”, pasi gazetari Elton Qyno shkruan për OraNews se ai ka treguar emrat e mbi 30 personave të përfshirë në ngjarje kriminale, kryesisht financues e porositës. Organi i akuzës ka tërhequr nga rrethet edhe dosjet e ngjarjeve për të cilat ka folur Alibej dhe po rishqyrton rrethanat e provat.
Së fundmi është marrë në pyetje edhe Elton Kila alias (Oti i Elbasanit), i cili është personi të cilin Nuredin Dumani dhe Henrik Hoxha, kishin planifikuar të vrisnin në muajin mars 2022 në Elbasan, me urdhër të Suel Çelës. Arsyeja ishte sepse “Oti” ‘strehonte dhe mbante me bukë’ Talo Çelën.
Përves vrasjes së Ramazanit e Runajt, Alibej dyshohet të jetë porositësi i vrasjes së efektivit Krenar Guçe, i cili ka mbajtur detyrën e Shefit të Seksionit të vrasjeve në Policinë e Elbasanit në vitet 2019-2020. Erion Alibej dyshohet se ka gisht edhe vrasjen e Bujar Çelës, vëllait të Talo Çelës, i ekzekutuar në Bradashesh.
Erion (Andrea) Alibej (Dylgjeri) e ka nisur fillimisht si trafikant kokaine, kur ishte 27 vjeç, në Itali. Bashkëpunimin e kishte me të vëllanë, Endrit Alibejn, me të cilin u kap në vitin 2013. Endriti ishte koka e grupi që përbëhej nga 12 shqiptarë, por me vrasjen e tij, Erion Alibej nuk e kishte më prioritet trafikun e kokainës, por hakmarrjen.
Ai nisi një valë vrasjesh e përplasjesh për të marrë hakun e të vëllait që iu vra në Bradashesh vetëm dy ditë para ndërrimit të viteve, në dhjetor të vitit 2018.
Bashkë me Endrit Alibejn mbeti i vrarë edhe xhaxhai i tij, Arben Dylgjeri dhe shtetasi turk Erdal Durnay. Ata ishin kthyer për festat e fundvitit dhe po udhëtonin në një automjet luksoz “Range Rover”, që ndoqej nga një tjetër makinë, brenda të cilës ishin gratë e fëmijët e tyre, kur u sulmuan nga një breshëri kallashnikovi.
Në kërkim për masakrën me tre viktima është shpallur Mikale Qosja, i cili dyshohet se është një nga ekzekutorët dhe fshihet në Dubai. Por në atentat dyshohej të ishte përfshirë edhe famëkeqi Talo Çela, emri i të cilit është përmendur në grabitjen e Rinasit dhe për shumë vrasje të tjera në vend. Nga marrja në pyetje që i është bërë në Komisariatin e Elbasanit, ku ka pretenduar se s’ka pasur gisht me ngjarjen e ndodhur dhe se ka qenë në shtëpi natën e ngjarjes, por për Erion Alibejn nuk ishte i besueshëm ky version. Ndaj ai i vrau të vëllanë. Erion Alibej u arrestua në shtator të vitit 2020 dhe vetëm pak javë më vonë, iu vra kunati në Belgjikë, Ardit (Arjan) Spahiu. Edhe pas kësaj vrasjeje, dyshohet se fshihet Mikael Qosja.
