Bordi i Mbikëqyrjes Publike (BMP) dhe Qendra Kombëtare e Biznesit (QKB) do të shtojnë bashkëpunimin, me synim shtimin e mbikëqyrjes mbi subjektet e regjistruara në QKB, të cilat kanë detyrimin për të dorëzuar bilancet vjetore. Të dy institucionet nënshkruan së fundmi marrëveshjen për bashkëpunimin dhe shkëmbimin e informacionit.
Marrëveshja e firmosur nga z. Dritan Fino, Kryetar i Bordit të Mbikëqyrjes Publike dhe znj. Iris Ago Drejtore e Qendrës Kombëtare të Biznesit përmban disa pika dhe ka në fokus shkëmbimin e informacionit për veprimtarinë e kryer nga subjektet që mbajnë titullin “Auditues Ligjor” dhe “Kontabilist i Miratuar” si dhe të profesioneve të tjera, të cilat bien ndesh me profesionin e kontabilistit të miratuar dhe audituesit ligjor.
“Marrëveshja Strategjike rrit mbikëqyrjen dhe transparencën në sektorin e auditimit ligjor dhe raportimit financiar”, tha Dritan Fino, Kryetar i Bordit të Mbikëqyrjes Publike.
Znj. Iris Ago Drejtore e Qendrës Kombëtare të Biznesit pohon se palët në këtë marrëveshje u angazhuan që me shkëmbimin e ndërsjellë të informacionit të mundësojnë një klimë të përshtatshme të sistemit të mbikëqyrjes publike të audituesve ligjorë dhe të shoqërive audituese, e cila nis që me regjistrimin e tyre në Qendrën Kombëtare të Biznesit. “Kjo marrëveshje pritet të ketë një ndikim pozitiv në misionin e përditshëm të secilit institucion dhe mbi të gjitha të jetë në shërbim të interesit publik”, shtoi ajo.
Marrëveshja, sipas njoftimit zyrtar, synon forcimin e mbikëqyrjes në lidhje me subjektet e regjistruara pranë QKB-së, të cilët kanë depozituar informacionin vjetor në përputhje me legjislacionin, mbi audituesin ligjor, raportin e auditimit, pasqyrat financiare dhe hartuesin e pasqyrave financiare duke kontrolluar subjektet certifikuese të tyre, dhe marrjen e masava të drejtpërdrejta ndaj shkeljeve të konstatuara.
Në bazë të marrëveshjes, palët do të shkëmbejnë informacion mbi bazën e kërkesës së dërguar nga pala kërkuese (BMP), për subjektet që mbajnë titullin “Auditues Ligjor” dhe “Kontabilist i Miratuar”, apo që mund të jetë subjekte të tjera, të cilat bien ndesh me profesionin e kontabilistit të miratuar dhe audituesit ligjor;
Një tjetër fushë është shkëmbimi i informacionit, mbi bazën e kërkesës së dërguar nga pala kërkuese (BMP), në lidhje me subjektet të regjistruar pranë QKB, të cilët kanë depozituar informacionin vjetor në përputhje me legjislacionin, mbi audituesin ligjor, raportin e auditimit, pasqyrat financiare dhe hartuesin e pasqyrave financiare, me qëllim kryqëzimin e informacionit të depozituar pranë BMP;
Në fokus do të jetë edhe shkëmbimi i informacionit, mbi bazën e kërkesës së dërguar nga pala kërkuese (BMP), për të gjithë subjektet shoqëri juridike/ persona fizikë të cilët kanë depozituar pranë Regjistrit Tregtar, pasqyrat financiare vjetore dhe raportin e auditimit;
BMP mund të kërkojë informacion, mbi bazën e kërkesës së dërguar nga pala kërkuese (BMP), lidhur me pasqyrat financiare të audituara, dhe nxjerrja e të dhënave statistikore si totali aktiveve, totali i të ardhurave, numri mesatar i punonjësve, etj.;
Po ashtu marrëveshja parashikon shkëmbimin e informacionit, mbi bazën e kërkesës së dërguar nga pala kërkuese (BMP), lidhur me audituesit ligjorë/shoqëritë e auditimit, kontabilistët e miratuar/ shoqëritë e kontabilitetit, që kanë të drejtë të ofrojnë shërbimet e përcaktuara në ligjin e auditimit.
Bordi i Mbikëqyrjes Publike ka për mision mbikëqyrjen publike të audituesve ligjorë dhe shoqërive të auditimit, organizatave profesionale të audituesve ligjorë si dhe organizatave profesionale të kontabilistëve të miratuar me qëllim përmbushjen e objektivave publike në mbështetje dhe në zbatim të ligjit, akteve nënligjore, kuadrit rregullator dhe në shërbim të interesit publik, si dhe të rrisë sigurinë që auditimet ligjore kryhen në një mjedis transparent, të kontrolluar dhe të kujdesshëm e në shërbim të interesit publik.
Qendra Kombëtare e Biznesit është institucion i administratës shtetërore dhe funksionon si një qendër e vetme për ofrimin e shërbimeve të regjistrimit dhe licencimit të biznesit, si dhe regjistrimit të pronarëve përfitues./Monitor
