VLORË– Pamjet që po shihni tregojnë momentin kur Forcat “Shqiponja” shtrijnë në tokë dhe arrestojnë Hasim Musarajn, 29-vjeçarin e shpallur në kërkim ndërkombëtar nga Italia për vrasje me armë zjarri. Pas ndjekies shihet se si Policia ndalon të riun dhe e shtrin në tokë ku dhe i vendos prangat dhe e fut më pas në furgon për ta çuar drejt Komisariatit të Vlorës ku dhe do të merret në pyetje. Musaraj ishte shpallur në kërkim nga Interpol Roma pasi në vitin 2017 vrau Shpëtim Frashërin në Itali. Musaraj, i cili mbante dhe mbiemrin Murataj pritet të ekstradohet drejt shtetit fqinj.
NJOFTIMI I POLICISË:
Vlorë/Finalizohet një tjetër operacion për kapjen e shtetasve me rrezikshmëri të lartë shoqërore të shpallur në kërkim ndërkombëtar për krime kundër personit.
Operacioni policor i koduar “Red Fox”, u zhvillua nga shërbimet operacionale dhe ato të Forcës së Posaçme “Shqiponja”, të DVP Vlorë, në bashkëpunim me Interpol Tiranën. Lokalizohet si rezultat i inteligjencës informative, kapet dhe vihet në pranga, 29-vjeçari i kërkuar nga autoritetet e Italisë, për vrasje me armë zjarri. Shërbimet operacionale dhe ato të Forcës së Posaçme “Shqiponja”, të DVP Vlorë, si rezultat i informacioneve të siguruara nga inteligjenca policore, mbi vendndodhjen e një shtetasi me rrezikshmëri të lartë shoqërore, të kërkuar nga Italia, kanë finalizuar operacionin policor të koduar “Red Fox”. Në kuadër të këtij operacioni, në lagjen “Uji i ftohtë”, shërbimet e Policisë kanë konstatuar automjetin me të cilin qarkullonte shtetasi H. M. (M.). Shërbimet e Policisë kanë ndërhyrë menjëherë dhe si rezultat i veprimeve profesionale, është neutralizuar dhe vënë në pranga shtetasi H. M. (M.), 29 vjeç, banues në Vlorë. Nga verifikimet e kryera ndërmjet Interpol Tiranës dhe Interpol Romës, rezultoi se ky shtetas ishte shpallur në kërkim ndërkombëtar, pasi Gjykata e Apelit e Torinos i ka caktuar masën e sigurisë “Arrest në burg”, për veprat penale “Vrasja” dhe “Prodhimi dhe mbajtja pa leje e armëve, armëve shpërthyese dhe municionit luftarak”, parashikuar nga Kodi Penal i Italisë. 29-vjeçari, në bashkëpunim me shtetas të tjerë shqiptarë, në tetor të vitit 2017, ka vrarë me armë zjarri, shtetasin Sh. F. Interpol Tirana, në bashkëpunim me Interpol Romën, vijon procedurat për ekstradimin e këtij shtetasi, drejt Italisë.
