TIRANË– Detaje të reja janë zbardhur në lidhje me dosjen e Prokurorisë së Posaçme Kundër Korrupsionit dhe Krimit të Organizuar (SPAK) sa i përket aferës së “Sterilizimit” që çoi në pranga ish-zëvendësministrin e Shëndetësisë Klodjan Rrjepaj dhe biznesmenin Ilir Rrapaj. Raportohet se në dosjen voluminoze të SPAK thuhet se kontrata e koncensionit të sterilizimit që po hetohet është zhdukur dhe nuk ndodhet në arkivat e Ministrisë së Shëndetësisë.
Pjesë nga dosja hetimore: Në zbatim të këtij vendimi, oficerët e policisë gjyqësore kanë sekuestruar dosjen e koncesionit pranë Ministrisë së Shëndetësisë. Gjithashtu duhet theksuar se me gjithë kërkimet në institucion dhe arkivën e ministrisë së Shëndetësisë, zyrtarët e këtij institucioni nuk gjetën dhe nuk venë në dispozicion kontratën origjinale të koncesionit dhe as anekset përkatëse. Dokumentacioni i sekuestruar është origjinal i kopjes së njehsuar të dërguar nga ministria e Shëndetësisë për sa i përket procedurës së dhënies së koncesionit me shkresën numër 910/ 1 datë 19 shkurt 2020.
