TIRANË- Shtesat në buxhetin e vitit 2022 kanë krijuar ‘përplasje’ në Komisionin e Ekonomisë. Gjatë fjalës së saj në komision, ministrja e Financave Delina Ibrahimaj është ‘përplasur’ me deputetin socialist Erion Braçe në lidhje me menaxhimin e buxhetit dhe shpenzimet kapitale. Ministrja tregoi ndryshimet që do të bëhen në buxhet që përfshin rritje fondesh për disa institucione dhe rialokim fondesh në disa të tjera.
“Projektet që nuk kanë arritur objektivat, rialokojnë fondet tek projekte më primare. 12.4 mld lekë shtohen për fondin e rindërtimit. 5 mld lekë për transportin rrugor, përfshirë tunelin e Llogarasë dhe Unazën e Tiranës. 2 mld lekë për ujësjellësin. 1.2 mld lekë për Albgaz dhe 2 mld për Aviacionin Civil. Po ashtu do të ketë 500 mln lekë për Komitetin Olimpik Shqiptar dhe 70 mln për FSHF-në. 200 mln për fermerët”, tregoi ministrja Ibrahimaj.
Ndërkohë që nga ana tjetër deputeti Braçe, për ndarjen e fondeve për Komitetin Olimpik dhe Federatën e Futbollit, tha se ato janë OJF dhe statusi ia ndalon të marrin para nga shteti. Braçe gjithashtu përmendi dhe paratë shtesë për Korporatën e Investimeve, Albgaz dhe Aviacionin Civil duke thënë se çfarë mund të bëjnë ato me 15 ditë të mbetura deri në fund të vitit.
“Nuk mund të shkojnë paratë atje ku janë paratë. Nuk shkon kështu. FSHF-ja bërtet se qeveria po e cënon dhe prap pranon para nga shteti. Për çfarë i duhen? Nuk kanë lekë ata? Po për KOKSH? Vjet pati 500 mln lekë fonde të dhëna, çfarë do bëjë deri më 31 dhjetor me 250 mijë?”, tha Braçe.
Për këto Ibrahimaj tha se këto institucione nuk janë buxhetore dhe e marrin fondin dhe e përdorin sipas vendimeve.
“Albgaz do të bëjë gazifikimin, i rëndësishëm për zhvillimin e tregut të gazit. Ka disa nisma, por duhen fondet njëherë. KOKSH vjet ka ngritur ekipe sportive nëpër shkolla dhe mund t’ju tregojmë si janë përdorur fonde. Në FSHF fondet do të shkojnë për mbështetje të ekipit kombëtar. Shpenzimet kapitale, uroj të zbatohen deri në fund të vitit, por nuk i kemi ne në dorë”, tha Ibrahimaj.
