TIRANË– Agjencia e Mbikëqyrjes Policore ka kallëzuar këtë të martë në Prokurorinë e Tiranës skandalin me sistemin TIMS. Ky kallëzim vjen pak ditë pasi i dërguari me punë i ambasadës amerikane në Tiranë, Martin McDowell në një takim me ministrin e Brendshëm Taulant Balla shprehu shqetësimin e SHBA lidhur me shkeljen në sistemin TIMS në Policinë e Shtetit, duke kërkuar hetim të shpejtë dhe të plotë.
Raportohet se kallëzimi është bërë për “shpërdorim detyre” dhe dyshime për ndërhyrje në mënyrë të paautorizuar në sistemet e policisë së shtetit. Ndërkohë ende nuk ka asnjë emër të dyshuar si të përfshirë në këtë skandal. Kallëzimi nuk është regjistruar ende sepse prokurorët janë me leje dhe të hënën do të hidhet në short.
