TIRANË– Kryeministri Edi Rama ka vizituar këtë të martë kërkimet që po kryhen për naftë në malin e Shpiragut. Përmes një postimi në rrjetet sociale Rama shkruan se vijojnë kërkimet për naftë. Ndër të tjera kreu i qeverisë shprehet se kjo përpjekje 10-vjeçare po i afrohet orës vendimtare të së vërtetës.
POSTIMI:
Sot në Shpirag, ku zbulimi i rëndësishëm i kryer 6.1km në thellësi të tokës naftëmbajtëse, mbart bashkë me premtimin e madh të nxjerrjes së një pasurie të konsiderueshme për Shqipërinë dhe shqiptarët, edhe sfidën e testit përfundimtar teknik të vlerësimit të qëndrueshmërisë së presionit të fluksit të gazit e të naftës, deri mbi sipërfaqen e tokës. Në fund të këtij viti do ta mësojmë këtë, ndërkohë që po punojmë paralelisht për projektin e Fondit Sovran që do të administrojë këtë pasuri të madhe kombëtare, duke u nisur nga studimi i vëmendshëm i praktikave botërore të fushës, si fondet sovrane të Norvegjisë, Arabisë Saudite, Azerbajxhanit e me radhë. Paçim fat tanimë kur kjo përpjekje thuajse dhjetëvjeçare, po i afrohet orës vendimtare të së vërtetës.
