RUSI– Shefi i Wagner-it, Yevgeny Prigozhin ka humbur jetën këtë të mërkurë së bashku me nëntë persona të tjerë që udhëtonin bashkë me të në një avion privat pasi ky i fundit u rrëzua në Rusi. Raportohet se shtatë pasagjerë dhe tre anëtarë të ekuipazhit ishin në bordin e avionit Embraer, i cili po udhëtonte nga Moska në Shën Petersburg, shkruajnë mediat e huaja.
Avioni thuhet se është rrëzuar në rajonin Tver, në veri të Moskës. Yevgeny Prigozhin udhëhoqi një rebelim kundër ushtrisë dhe qeverisë ruse në qershor, por që përfundoi kur presidenti bjellorus Alexander Lukashenko ndërhyri për të ndërmjetësuar një marrëveshje.
Yevgeny Prigozhin, dikur një mik i ngushtë i presidentit rus Vladimir Putin kishte kritikuar shpesh ministrin e Mbrojtjes, Sergei Shoigu dhe gjeneralin e lartë, Valery Gerasimov, në fjalimet publike për trajtimin e pushtimit të Ukrainës nga ana e tyre. Marrëdhënia e tij me Putin u përça pas rebelimit të Wagner.
