SARANDË– Detaje të reja janë zbardhur në lidhje me ngjarjen e rëndë të regjistruar në orët e para të mëngjesit të kësaj të shtune ku Antonio Delilaj, 17 vjeç humbi tragjikisht jetën pasi u zu nga ashensori i lokalit “Orange Club”. Raportohet se kavoja e ashensorit është këputur duke bërë që ashensori të bjerë me shpejtësi poshtë. 43-vjeçari Lulzim Allushi që kishte montuar ashensorin mësohet se ishte i palicensuar. Po ashtu mësohet se pas montimit të ashensorit ai nuk kishte shkuar ti bënte kontrollet e nevojshme të mirëmbajtjes ç’ka shkaktoi dhe tragjedinë.
Në momentin e ngjarjes pronari i lokalit, tashmë i shpallur në kërkim nga Policia Spiro Iljadhi nuk ndodhej në ambientet e biznesit. Ndërkohë Spiro Iljadhi nuk është një emër i panjohur për Policinë pasi është përfshirë disa herë në incidente si dhe i ka shpëtuar një atentati ndaj tij. Në 21 qershor të vitit 2021 ndaj tij u qëllua me 20 plumba por fatmirësisht ai shpëtoi. Një plumb e preku në bark por pas ndihmës mjekësore doli nga spitali. Autorë ishin dy vëllezërit Andrea dhe Visi Caushi, si dhe Redjan Hadëraj, të cilët u arrestuan nga Policia.
