TIRANË– Ministri i Mbrojtjes Niko Pelshi ka dhënë detaje këtë të hënë në lidhje me situatën nga zjarret në vend. Sipas Peleshit aktualisht të gjitha vatrat e zjarrit në vend janë të shuara duke mos pasur asnjë vatër aktive. Ndërkohë të gjitha strukturat e mbrojtjes civile janë në gatishmëri të plotë.
Niko Peleshi: Të shtata vatrat e zjarrit që ditën e djeshme përfshinë zona të ndryshme të vendit janë shuar dhe aktualisht nuk kemi asnjë vatër aktive në vend, pavarësisht temperaturave të larta. Në fshatin Krastë, në bashkinë e Krujës, të gjitha vatrat që ishin aktive janë shuar. Puna intensive dhe angazhimi maksimal bëri të mundur shuarjen përfundimtare të flakëve edhe në vendgrumbullimin e mbetjeve urbane, në Elbasan. Situata po monitorohet nga forcat e zjarrfikëses së bashkisë së këtij qyteti. Të gjithë strukturat e mbrojtjes civile në nivel vendor dhe qendror mbeten në gatishmëri të plotë.
