TIRANË– Kryeministri Edi Rama ka inspektuar këtë të martë procesin e sperilizimit në Spitalin “Shefqet Ndroqi”. Gjatë bisedës me mjekët Rama tha se pavarësisht hetimeve të Prokurorisë së Posaçme procesi i sterilizmit nuk do të ndërpritet. Por kreu i qeverisë nuk tha asnjë fjalë për hetimet e SPAK dhe faktit se PPP-ja u nda mes miqve të ish-zëvendësministrit të arrestuar dhe nuk tha se ku kanë shkuar 110 milionë eurot e taksave të qytetarëve shqiptarë. Edhe këtë të martë Rama mbrojti këtë Partneritet Publik Privat por pa dhënë sqarime.
Edi Rama: Në një nga 17 centralet e reja të krijuara falë PPP-së së sterilizimit, që kanë garantuar një standard krejt të ri sigurie për ndërhyrjet operatore, duke e kthyer njëherë e mirë faqen e turpit e të pasigurisë në sallat e operacioneve, duke ulur në minimum fenomenin e vjetër të infeksioneve post-operatore si pasojë e mungesës së sterilizimit të vërtetë, si edhe duke i kursyer shtetit dhjetëra miliona euro nga ulja e ditëve të qëndrimit në spitale pas operacioneve. Hetimi i SPAK-ut për abuzime të mundshme në procesin e ndërtimit të këtij Partneriteti Publik Privat, nuk e cenon aspak suksesin e prekshëm të kësaj nisme madhore të qeverisë shqiptare për Rilindjen e Shëndetësisë, por siguron që askush të mos mbetet i pandëshkuar nëse ia bën me hile shtetit dhe popullit shqiptar, duke nxjerrë përfitime vetjake të paligjshme gjatë kryerjes së detyrës në punën për qëllimin e përbashkët.
