TIRANË– Instituti i ndërtimit ka reaguar ditën e sotme në lidhje me prishjen e pallatit numër 4 në rrugën ‘Myslym Keta’ në Tiranë. Instituti ka bërë publike një shkresë që mban datën 15 dhjetor 2022 në të cilën shkruhet se pallati paraqet rrezikshmëri të lartë për jetën e banorëve.
Ndërkohë Bashkia e Tiranës në një shkresë të drejtuar së fundi në Institutin e Ndërtimit konkretisht kreut të këtij institucioni Artan Shkreli ka kërkuar një rikonfirmim të Oponencës Teknike, të kryer nga ky institucion që në vitin 2020, e cila ka dalë në përfundimin se pallati është i pabanueshëm për shkak të dëmtimeve të rënda në strukturë. Ndërsa Instituti i Ndërtimit në përgjigje të shkresës së bashkisë e rikonfirmon oponencën e vitit 2020.
“Në bazë të kërkesës suaj, Nr. 44366 Prot, datë.15.12.2022, protokolluar me tonën me Nr.2212 Prot, datë.16.12.2022, “Kërkesë për rikonfirmim të Oponencës Teknike”, për objektin: “Pallati Nr.4”, Rruga “Myslym Keta”, Njësia Administrative Nr.4, Tiranë, ju vëmë në dijeni se: Në mungesë të dokumentacioneve të reja, për këtë objekt, rikonfirmojmë oponencën teknike me Nr. 1924/2 Prot , datë.05.08.2020, të bërë mbi bazën e materialeve të paraqitura nga ana juaj”, thuhet në përgjigjen e Artan Shkrelit.
