Ardhja në jetë e një fëmijë është një moment shumë i bukur dhe i veçantë për çdo prind,por depresioni që shfaqet pas lindjes kërkon një vëmendje të madhe pasi shumica e grave pas lindjes së fëmijës përjetojnë një gjendje jo të mirë mendore. Fatmirësisht, ditët e sotme gjithmonë e më shumë po i kushtohet rëndësi shëndetit mendor dhe kjo nuk është më një tabu.
Ne kemi dëgjuar se janë gratë ato të cilat preken nga ky depresioni, por e vërteta është se edhe meshkujt preken. Shoqata Mjekësore Amerikane ka publikuar një studim ku tregon se 10% e baballarëve të ardhshëm shfaqin simptomat e depresionit post-partum që në tremujorin e parë të shtatzënisë së grave të tyre deri në 6 muaj pas lindjes së foshnjës.
Kjo ndodh për shkak se niveli i hormonit seksual mashkullor testosteron zvogëlohet, ndërsa niveli i hormoneve “femërore” – estrogjenit dhe prolaktinës, si dhe i “hormonit të stresit” (kortizolit) rritet. Këto çrregullime të kombinuara me mungesën kronike të gjumit shkaktojnë probleme të shëndetit mendor tek ata.
Mungesa e gjumit nuk është problemi i vetëm te baballarët,sepse ndikojnë edhe faktorë të tjerë si psh:marrëdhënia e ftohur me partneren, problemet financiare, përgjegjësitë rreth foshnjës.
Por cilat janë simptomat e depresionit pas lindjes te baballarët?
Për disa baballarë depresioni pas lindjes shfaqet me një humor të vazhdueshëm depresiv, ndërsa disa të tjerë bëhen nervozë e agresivë. Ata mund të vuajnë nga ngulçimi madje edhe nga sulme paniku; mund të humbasin interesin për aktivitete që më parë u kanë sjellë gëzim.
Sipas ekspertëve me këtë situatë përballen edhe baballarë të cilët kanë kërkesa të larta ndaj vetes sepse herë pas here e venë në dyshim nëse janë apo jo baballarë të mirë për fëmijët e tyre.
