Ditën e sotme Ministrja e Arsimit dhe Sportit, Evis Kushi zhvilloi një takim me disa nga maturantët që morën rezultatet më të mira në provimin hyrën në programin “Mjekësi e Përgjithshme”. Në fjalën e mbajtur Kushi falënderoi maturantët për përkushtimin e treguar jo vetëm në provimet e maturës, por edhe provimin e informatizuar, i cili u zhvillua për herë të parë këtë vit. Kështu shprehet ajo:
“Shumë faleminderit për prezencën, shumë faleminderit që pranuar ftesën tonë. Unë jam këtu së bashku me drejtoreshën e qendrës së shërbimeve arsimore, drejtoreshën e QSHA, për t’ju përgëzuar në radhë të parë për sukseset tuaja dhe jo vetëm për suksesin e testit të automatizuar, por për sukseset që keni arritur gjatë gjithë viteve të studimeve. Edhe studimet në tre vite të gjimnazit, suksesi në provimet e maturës, por veçanërisht për suksesin shumë të spikatur tuajin në testin e automatizuar”.
Pjesë e këtij takimi ishte edhe drejtoresha e QSHA-së znj. Aurora Balliu ku së bashku me Ministren dëgjuan opinionet dhe sugjerimet e maturantëve që ata kishin që prej dhjetorit të shkuar.
“Ne sot së bashku me ju duam të zhvillojmë një bashkëbisedim pikërisht në lidhje me këtë test, dhe risitë që ne kemi ndërmarrë për programin mjekësi e përgjithshme. Duam të diskutojmë që nga vendimi ynë për të përfshirë një test të tillë në ranikimin e maturantëve, me qëllim kryesor të shmangim fiktivitetin dhe meritokracia dhe transparenca të jetë thelbi, veçanërisht për studentët e mjekësisë sepse është programi më i kërkuar nga studentët ekselentë që janë me 10 -ta. Ku diferencat mes jush janë shumë të vogla. Duke u bazuar në mendimet tuaja dhe rezultatet e vitit të parë të reflektojmë që të bëjmë ndryshimet e duhura vitin tjetër dhe pse jo, ta shtrijmë këtë metodë edhe për programe të tjera studimi, apo ndoshta edhe për provimet e maturës”
Ministria gjithashtu shprehet se vendi jonë është përballur me problemin e nevojave për mjekë dhe specialistë në sistemin shëndetësor dhe për të gjithë studentët e mjekësisë që plotësojnë detyrimin për të qëndruar 5 vite në Shqipëri, do të kenë një trajtim të veçantë si në në punësim edhe në politikat e strehimit, kredi të buta për shtëpi.
Studentët ishin të mendimit se do ishte më mirë që periudha 5-vjeçare e qëndrimit të tyre në Shqipëri të ulej deri në tre vite. Kushi tregon se brenda 5-vjeçarit përfshihet edhe periudha e specializimit.Ajo e përmbyll këtë çështje me këtë citim:
“Mos harroni që këtu brenda është edhe periudha e specializimit. Pra në qoftë se ju do të vendosni që menjëherë pas diplomimit të specializoheni, ky detyrim është i përfshirë. Pra mund të ndodhë që në fund të specializimit, ju e keni shlyer edhe detyrimin që keni për të qëndruar në Shqipëri”.
