Katërmbëdhjetë persona kanë vdekur dhe më shumë se 150 raste janë konfirmuar pas një shpërthimi të sëmundjes së legjionarëve në Poloninë juglindore.
Shumë prej të infektuarve janë dërguar në spital që kur u zbulua sëmundja javën e kaluar.
Nëntë raste të reja u diagnostikuan të martën.
Autoritetet janë ende duke kontrolluar se si bakteri legjionella, që shkakton sëmundjen, u fut në ujësjellësin në qytetin Rzeszoë dhe rrethinat e tij.
Vendndodhja e shpërthimit fillimisht ngriti shqetësime sepse Rzeszoë është qendra për ndihmën ushtarake dhe humanitare për Ukrainën dhe pret një prani të madhe ushtarake amerikane.
“Ne nuk kemi gjetur asnjë informacion që kemi të bëjmë me sabotim,” i tha transmetuesit Polsat News Stanislaë Zaryn, i plotfuqishmi i qeverisë polake për sigurinë e informacionit.
Ai tha se shërbimet speciale donin të përjashtonin sabotimin, duke pasur parasysh vendndodhjen e shpërthimit.
Sëmundja e Legjionarëve është një infeksion serioz i mushkërive që transmetohet duke thithur pika të vogla të ujit të infektuar, jo duke pirë ujë të kontaminuar. Nuk është ngjitëse.
Njerëzit mund të infektohen kur bëjnë dush, kur lajnë tualetin ose nga një sistem klimatizimi, shkruan BBC.
Simptomat fillestare mund të ngatërrohen me gripin, dhe mbi të 50-at dhe ata, sistemi imunitar i të cilëve është i komprometuar, janë veçanërisht të prekshëm ndaj sëmundjes.
Sëmundja e legjionarëve trajtohet përmes një kursi antibiotikësh.
Shumica e njerëzve që vdiqën ishin të moshuar. Të gjithë vuanin nga sëmundje të tjera kronike, përfshirë kancerin.
Hetimet për të përcaktuar shkakun e shpërthimit po vazhdojnë. Mostrat fillestare të provës kanë rezultuar jokonkluzive në lidhje me burimin e baktereve.
Klor shtesë është shtuar në sistemin e ujësjellësit komunal si një dekontaminues dhe autoritetet kanë paralajmëruar banorët që të ziejnë ujin përpara se ta pinë.
Bakteri u identifikua për herë të parë në 1977 si shkaku i një shpërthimi të pneumonisë së rëndë në një qendër kongresi të Legjionit Amerikan në Filadelfia.
