Zona e Nënshkodrës edhe këtë të shtunë është zgjuar nën mbretërinë e ujit për shkak të shkarkimeve pa kriter nga hidrocentralet e kaskadës së lumit Drin dhe reshjeve të shiut. Situata më kritike është fshatin Obot, ku ka prezencë uji në 55 banesa dhe një sipërfaqe tokë prej 1350 hektarësh është nën ujë. Banorët shprehen se dëmet janë të pallogaritshme.
Shkarkimet pa kriter nga hidrocentralet e kaskadës së lumit Drin dhe reshjet e shiut kanë bërë që prej ditësh zona e Nënshkodrës të jetë nën mbretërinë e ujit.
SYRI TV ishte sot në fshatrat e njësisë administrative Ana e Malit, ku uji ka përmbytur rreth 1350 hektarë tokë, ndërsa më kritike situata është në fshatin Obot, i cili është totalisht i izoluar nga uji.
Rruga për në këtë fshat kalohet veë me mjete te rënda të ushtrisë dhe varka, pasi niveli ujit shkon deri në 1.5 metra Sipas bashkisë së Shkodrës, në Obot ka prezencë uji në 155 banesa, teksa strukturat e bashkisë janë angazhuar në ndihmë të banorëve, duke siguruar ushqim dhe ujë për ta.
SYRI TV ishte edhe në fshatin Goricë, ku situata paraqitet kritike. Uji ka mbuluar gjithçka, duke shkaktuar dëme kolosale për fermerët dhe blegtorët, dhe pamjet nuk kanë nevojë për shumë koment. Banorët shprehen se shkaku kryesor i përmbytjeve janë shkarkimet pa kriter dhe bilanci i dëmeve sipas tyre është pallogaritshëm.
Ndërkohë kritike është situata edhe në qarkun e Lezhës, ku dalja nga shtrati e Matit dhe reshjet intensive kanë shkaktuar probleme më të shumta në Kurbin. Ura e Mamurrasit është e pushtuar nga uji duke penalizuar lëvizjen për orë të tara, ndërsa banorët hedhin akuza në drejtim të bashkisë së nuk ka pastruar kanalet kulluese, çka sipas tyre ka sjellë përmbytje masive. E njëjta panoramë në qarqet Shkodër e Lezhë është çdo vit për shkak të përmbytjeve, ndërsa masat për minimizimin e dëmeve edhe këtë vit kanë qenë të vakëta./SyriTv
