DURRËS-Gjykata e Durrësit ka dhënë masën e sigurisë ‘arrest me burg’ për 41-vjeçarin iranian Mousa Jaberifar, i cili u vu në prangat e policisë ditën e djeshme pasi shpërndante drogë të llojit ekstazi në qendrën e mbyllur për të huajt në Karreç të Durrësit. Po ashtu nën hetim është vënë dhe një 21-vjeçare e identifikuar si Edona H. Sipas policisë vajza ndihmonte 41-vjeçarin për shpërndarjen e drogës. Ajo e kryente transoportin me anë të qeseve ushqimore dhe i dërgonte pranë qendrës.
Top Channel shkruan se qesja me ushqimet dhe lëndën narkotike do i dërgohej shtetasit Mehdi Soleimani, i cili bashkë me disa shtetas të tjerë iranianë mbahen në këtë qendër. 21-vjeçarja ka deklaruar para hetuesve se, qesja me ushqime i ishte dhënë nga i arrestuari dhe ajo s’ka qenë në dijeni për lëndën naroktike që ishte fshehur brenda.
Mousa Jaberifar ka qenë i vetëm para togave të zeza pasi nuk ka pranuar që të ketë përkthyes pasi sipas tij e zotëron mirë gjuhën shqipe. Ndërkohë ka munguar dhe avokati i tij, i caktuar nga shteti. I arrestuari ka pretenduar para togave të zeza se droga e dyshuar si ekstazi është ilaç “-Lonitrol” që e ka blerë në Kamëz dhe ia ka dërguar shokut të tij përmes të fejuarës. Ai ka kërkuar falje nga ana e trupit gjykues me pretendimin se ka nënë të vetme dhe të sëmurë.
“Shoku im më tha se i dhemb mesi dhe unë e mora për ta ndihmuar. Kam bërë gabimi shumë, po ilaç farmacie është. Nuk është drogë. Te një farmaci në Kamëz e bleva. Afër policisë. Dua falje. Kam punë. Nëse ka problem unë rri në burg, po nuk ka. Mami është sëmurë dhe nuk e di që jam në burg. Unë dua falje.”, tha ai.
Mousa Jaberifar u arrestua në flagrancë ditën e djeshme nga blutë e Durrësit. Sipas Prokurorisë dyshohet se episodi për të futur lëndë narkotike brenda në qendër ka qenë dhe një tentativë e tij për të testuar masat e sigurisë.
