GJERMANI– Dy persona kanë mbetur të plagosur dhe një tjetër ka humbur jetën për shkak të një aksidenti zinxhir të regjistruar një ditë më parë në autostradën A2 në Gjermani. Zinxhiri i përplasjeve ndodhi të martën nga një kantier ndërtimi në autostradën A2 pranë qytetit të Magdeburgut. Kamioni me materialet e rrezikshme u përplas me tre kamionë të tjerë dhe më pas një kamion i pestë i ngarkuar me depozita me presion të lartë u përplas me katër të tjerët, tha DPA të mërkurën.
Për shkak të përplasjes kamionët u përfshinë nga flakët të cilat u përhapën me shpejtësi nga kamioni me kontejnerët e oksidit të azotit në atë me materiale të rrezikshme. Nuk dihet ende se çfarë lloj materialesh po transportonte ky i fundit, por autoritetet thanë se u lëshuan substanca toksike.
U raportuan disa shpërthime dhe banorëve aty pranë iu kërkua të qëndronin në shtëpi me dritaret e mbyllura për të shmangur ekspozimin ndaj tymit. Autoritetet vendosën një perimetër sigurie me një rreze prej 650 metrash rreth vendit të aksidentit ku askush nuk u lejua të hynte, duke përfshirë personelin e shpëtimit, tha dpa. Një pjesë e autostradës A2 mbeti e mbyllur mëngjesin e së mërkurës për shkak të rrezikut për shpërthime të tjera.
