Në datën 15 shtator, kryetari i zgjedhur i Bashkisë së Himarës, Fredi Beleri duhet të shkarkohet nga kryeministri Edi Rama dhe të shpallen zgjedhjet e reja. Është afati i fundit i 90 ditëshit që nga data e zgjedhjes, nëse një kryebashkiak nuk arrin të betohet, çka ka shumë të ngjarë që të mos ndodhë.
Por kryeministri Edi Rama i ka lënë një dritare hapur presioneve të Athinës zyrtare, duke lënë të nënkuptohet se Beleri mund edhe të mos shkarkohet prej tij.
Gjatë një interviste për ERT, Rama ka thënë se ligji shqiptar e parashikon shkarkimin e Belerit 90 ditë pasi ka dështuar të betohet, megjithatë ka shtuar se “ky është rast shumë specifik”.
Për të parë mënyrat e tjera se si mund të veprojë, mesa duket për të mos “prishur qejfe” në Athinë, Rama tha se i është drejtuar departamentit ligjor për të marrë një mendim.
Mbetet për t’u parë nëse do të gjendet ndonjë “marifet” ligjor nga ekspertët e departamentit, që do ishte në favor të Belerit. Megjithatë Rama shtoi se në fund të fundit është drejtësia ajo që do të caktojë nëse Beleri është apo jo i pafajshëm.
“Nëse unë nuk gaboj, zoti Goro i përket minoritetit, kjo është një arsye më shumë për të ngritur supet. Sepse zoti Goro që ka përfaqësuar si kryetar bashkie partinë që unë përfaqësoj, tregojnë që këtu s’ka një përplasje mes shqiparësh dhe grekësh. Ka një bashkëjetesë krejt të arsyeshme dhe normale, sa mijëra e mijëra tituj u ka dhënë ndërtimeve pa leje. Sot kishat në minoritet kanë tjetër pronësi, sepse nga periudha e komunizmit jetuan të zhveshura.
Kërcënimet për rrugën e Shqipërisë, në ndërkohë që qeveria nuk ka asnjë mundësi t’i japë leje një të burgosuri, është në mospërputhje të plotë me sovranitetin, qoftë edhe me bashkëjetesën evropiane, që janë vende demokratike dhe ku nuk mund të bëjë vaki që njëri vend t’i tregojë tjetrit se si mund të funksionojë. Jemi duke e studiuar rastin, pasi kur përfundon afati i 90 ditëve, qeveria duhet ta shkarkojë kryetarin që nuk është zgjedhur për betim, dhe të shpallë zgjedhjet, por ky është një rast shumë specifik dhe unë i jam drejtuar departamentit ligjor që të japë opinion se çfarë duhet të bëjmë. Unë do të lutesha që t’i linim procesit gjyësor për të thënë nëse është apo jo fajtor”, deklaroi Rama.
/ Newszone
