ITALI– Binak Çela, 39 vjeç është vënë këtë të enjte në prangat e Policisë italiane pasi që prej vitit 2018 ishte në kërkim ndërkombëtar. Çela konsiderohet një nga bosët e botës së krimit në kryeqytetin roman me bazë në lagjen Rocca Cencia. Në Itali ai identifikohej me pseudonimin Daniel Popescu. Ndaj tij rëndon akuza e armëmbajtjes pa leje dhe e grabitjes. Sipas autoriteteve italiane Çela është mjaft pranë bandës kriminale me veprim në veri të Romës, që drejtohet nga ish -boksieri Petrit Bardhi e që konsiderohet nga më të fortat në këtë qytet.
Binak Çela ka rënë rastësisht në “rrjetën” e Policisë. Ai u ndalua nga Policia Rrugore për një kontroll rutinë. Në momentin që ka parë efektivët 39-vjeçari ka tentuar të devijoijë rrugën duke shtuar dyshimet tek efektivët. Në momentin e ndalimit është justifikuar se ishte një turist e nuk njihte rrugët. Por kontrolli i Policisë Italiane zbardhi identitetin e tij duke e vënë në pranga. Arrestimi i shqiptarit mund të ndihmojë policinë italiane për të hetuar e zbardhur aktivitetin kriminal të bandave shqiptare në Romë.
