Ka nisur në pallatin e sportit ‘Asllan Rusi’ Kuvendi Kombëtar i Partisë Demokratike i thirrur nga Lulzim Basha.
Në kuvendin e sotëm pritet të prezantohen dhe të miratohen disa ndryshime të rëndësishme në statutin e PD.
Ndërkohë, ka propozuar edhe përjashtimin nga anëtarësia të të gjithë atyre që kanë kandiduar me subjekte të tjera, më konkretisht me Partinë e Lirisë së Ilir Metës, aleatin e Sali Berishës.
Por çfarë pritet të ndryshohet në statut?
Ndryshimet statutore që pritet të miratohen në Kuvend prekin dhe kreun e grupit parlamentar të PD-së, ku sipas statutit të ri, kur PD nuk është shumicë qeverisëse, kryetari i partisë është dhe kreu i grupit parlamentar, duke ia marrë kështu këtë kompetencë sekretarit të përgjitshëm të partisë.
Në këtë mënyrë pas miratimit të ndryshimeve në statut Basha pritet të jetë dhe kryetar i PD, por dhe kryetar i grupit parlamentar.
Ndryshimet në statut:
GRUPI PARLAMENTAR I PARTISË
1) Grupi Parlamentar i PDSH-së përbëhet nga deputetët e saj në Kuvendin e Shqipërisë.
2) Kur PDSH është shumicë qeverisëse, Kryetari i Grupit Parlamentar zgjidhet me propozim të Kryetarit të Partisë nga Këshilli Kombëtar, me votim të fshehtë, ndërmjet jo më pak se dy kandidaturave
3) Kur PDSH nuk është shumicë qeverisëse, Kryetari i Partisë është edhe Kryetar i Grupit Parlamentar. Kryetari i Partisë, me autorizim të tij, mund të caktojë një prej Nënkryetarëve të Partisë për të drejtuar Grupin Parlamentar.
4) Grupi Parlamentar i PDSH-së: a) përfaqëson në Parlament PDSH-në dhe siguron aty mbrojtjen e platformës, programit dhe interesave të PDSH-së; b) harton programin dhe përcakton mënyrën e veprimit e të angazhimit të deputetëve të tij në Parlament dhe në zonat elektorale përkatëse;
5) Rregullorja e funksionimit dhe përfaqësimi institucional i Grupit Parlamentar, miratohet me vendim të Kryesisë së Partisë.
Kuvendi i fundit
Kuvendi i fundit që PD zyrtare ka mbajtur ishte ai i 18 dhjetorit të dy viteve më parë, në kulmin e luftës me grupimin e Sali Berishës ku Basha mblodhi 5004 delegatë dhe vendosi që non gratat e SHBA të qëndrojnë larg drejtimit të partisë.
