Në Kuvendin Kombëtar të Partisë Demokratike që drejtohet prej tij, Lulzim Basha ka thënë se duart e pista të politikës së vjetër nuk mund të fshihen pas baltës ndaj tyre.
Gjithashtu Basha gjatë fjalës së tij theksoi se shkak i konfliktit dhe vështirësive me të cilat po përballet sot Partia Demokratike është Sali Berisha dhe të gjitha vendimet e tij nga pezullimi i Berishës deri tek dorëheqja e tij i quan veprime në funksion të të ardhmes së Partisë Demokratike.
Ndërkohë që Basha ka sulmuar Berishën, por dhe kryeministrin Edi Rama se kanë bërë Pazar mes tyre për kullën që do të ndërtohet pas Teatrit të Operas dhe Baletit.
“Unë nuk do të bëhem asnjëherë pjesë e teatrit që shfaq për ju çdo ditë kasta e politikës së vjetër, ndërkohë që ndajnë interesat në prapaskenë. Aty ku dëgjoni duke u sharë e shqyer më shumë, aty do të gjeni pazarin me të madh mes tyre, siç e pa mbarë bota në rastin e Kullës-Mal të korrupsionit në qendër të Tiranës.
Unë besoj se arsyeja e shëndoshë, deçenca, përulësia dhe shërbimi ndaj qytetarëve duhet të jenë vlerat e politikanit. Dhuna verbale apo fizike, vjedhja, bërtitja, sharja dhe korrupsioni janë antivlerat e rrënjosura në jetën politike 33 vjeçare. Tashmë ne e dimë që ka mbi një milion shqiptarë të cilët 3 muaj më parë i refuzuan këto antivlera të politikës. Dhe ky do të jetë koalicioni ynë për të drejtuar Shqipërinë – një koalicion vlerash”, tha Basha.
