TIRANË– Kryeministri Edi Rama në takimin e tij me mjekë e infermierë me rastin e festave të fundvitit u shpreh se objektivi i përhershëm i qeverisë së tij është shtrirja në terren e autonomisë spitalore. Ndërkohë kreu i qeverisë tha se do të kishte edhe një sistem të ri të pagave të mjekëve dhe infermierëve. Kështu sipas tij ata që do të kishin performancë më të mirë do të paguheshin më shumë.
Edi Rama: Mezi pres që të fillojë shtrirja në terren e autonomisë spitalore sepse është objektiv i përhershëm. Janë krijuar kushtet tani sepse ju e dini se është e thjeshtë ta thuash por e vështirë për ta realizuar. Lajmi i mirë është që ne kemi spitale universitare rajonale që janë akredituar duke marrë të gjitha pikat e nevojshme për të zotëruar standartet për akreditim. Janë 261 entitete dhe janë bazë shumë e mirë për të vazhduar me autonominë spitalore që do bëjë të mundur mundësinë që të mos bëhet më një vlerësim uniform i mjekëve por të kalohet në një vlerësim nga pikëpamja e performancës. Që do thotë se nëse për të gjithë ka një dysheme të garantuar pastaj shpërblimet sipas punës vlerësohen në bazë të performancës, kështu që ata të cilët bëjnë më shumë orë në shërbim, kryejnë më shumë vizita, apo operacione do të paguhen më shumë se të tjerët.
