Bashkimi Evropian (BE) i ka përsëritur kërkesat ndaj Kosovës dhe Serbisë për ndërmarrjen e hapave që u është kërkuar atyre për t’i krijuar kushtet për vazhdimin e dialogut dhe të përmbahen nga çdo veprim i pakoordinuar. Ishte Peter Stano, zëdhëndësi i Be-së për çështje të jashtme dhe të sigurisë, ai i cili i ka shprehur këto qëndrime duke rikujtuar angazhimin që Kosova ka marrë në Bratisllavë për de-eskalimin.
Ja se çfarë ka thënë ai për ‘Kohën’:
“BE-ja nënvizon deklaratën e Përfaqësuesit së Lartë në emër të BE-së të datës 3 qershor 2023, e cila i kërkoi Kosovës dhe Serbisë që të marrin masa për të de-përshkallëzuar situatën dhe të përmbahen nga çdo veprim i mëtejshëm i pakoordinuar. Kosova u angazhua për këto parime në Bratislavë në korrik 2023”.
Takimi i radhës i kryeministit të Kosovës, Albin Kurtit dhe presidentit të Serbisë, Aleksandar Vuçiq, do të zhvillohet më 14 shtator.
Për herë të fundit Kurti dhe Vuçiq janë takuar më 2 maj – nëntë ditë pas zgjedhjeve të jashtëzakonshme në veri të Kosovës, të cilat janë bojkotuar nga popullata lokale serbe. Që nga ajo kohë, mes dy vendeve ka pasur një sërë tensionesh dhe krizash.
Kujtojmë se më 10 korrik, Kosova dhe Bashkimi Evropian u pajtuan për disa hapa për shtensionimin e situatës në veri të Kosovës, përfshirë zvogëlimin e pranisë policore dhe organizimin e zgjedhjeve të reja në katër komunat veriore. Miroslav Lajçak, i dërguari i posaçëm i BE-së për dialog po i vazhdon takimet me përfaqësues të Kosovës dhe Serbisë për të përgatitur takimin e radhës në kuadër të dialogut. Lajçak e ka përmendur muajin shtator si afat kur mund të ndodhë takimi i radhës, por jo edhe ndonjë datë të saktë.
