Tensione në Kuvend mes deputetëve të PD dhe kryetares së Kuvendit, Lindita Nikolla.
Shkak u bë njoftimi i kryeparlamentares kur lexoi emrat e kryetarëve të grupeve parlamentare dhe citoi se Lulzim Basha do të jetë kryetar i grupit të PD.
Kjo deklaratë e Nikollës trazoi deputetët e opozitës.
Gazment Bardhi i kërkoi Nikollës të mos provokojë deputetët, duke i kujtuar asaj se kryetarin e grupit parlamentar të PD nuk e cakton PS-ja.
“Ta harroni që do të vijë dita që kreun e grupit parlamentar të PD-së do e zgjedhë PS. Atë ditë ti zonja kryetare, pas teje Rama ti bëni llogaritë mirë. Në rregullore ti lexon njoftime të grupeve parlamentare, nuk ka ndodhur ndonjëherë të jenë lexuar njoftime të partive politike. Partitë politike ta kryejnë funksionin jashtë kësaj salle. Janë deputetët e grupit parlamentar që vendosin kush është kryetari i grupit parlamentar të PD.
Disa kanë vendosur të bëhen qesharakë, ju kanë përfshirë edhe juve por mos provokoni deputetët e opozitës. Është paralajmërimi thjesht dhe i qetë”, tha Bardhi.
“Jeni konfuzë dhe po krijoni situatë të paprecedentë në Kuvendin e Shqipërisë”, iu përgjigj Nikolla.
/ Newszone
