Autoritetet shqiptare kanë nisur të përgatisin dokumentacionin e nevojshëm për procedurat e ekstradimit të Behar Bajrit nga Franca në Shqipëri.
Ai pritet të dalë menjëherë përpara një gjykate franceze në pritje të kërkesës nga Shqipëria.
Behar Bajri, i njohur edhe me mbiemrin Brajoviq, u arrestua në Paris ditën e hënë dhe mësohet se ai fshihej atje që prej lëshimit të urdhër-arrestit.
43-vjeçari akuzohet nga Prokuroria e Posaçme se ishte organizator në vrasjen e shtetasit Gjin Boriçi në Shkodër. Gjithashtu në plagosjen e shtetasit Taulant Pepaj, dhe në përgatitjen e planeve për atentate që nuk u realizuan në 3 raste.
Ngjarjet u zbardhën nga komunikimet enkriptuara në rrjetin Sky, të sjella në Shqipëri nga autoritetet franceze, ku Behar Bajri rezulton në dhjetëra komunikime me biznesmenin Pëllumb Gjoka dhe disa të tjerë, teksa flasin për ngjarjet kriminale.
Interpol Tirana, në bashkëpunim me agjencitë ligjzbatuese dhe me Interpol Parisin, vijojnë punën për plotësimin e dokumentacionit, me qëllim ekstradimin drejt vendit tonë, të 43-vjeçarit.
“Kapja e këtij shtetasi tregoi edhe një herë bashkëpunimin serioz, profesional dhe të besueshëm mes Policisë së Shtetit dhe partnerëve, si dhe vendosmërinë e Policisë së Shtetit, për të gjurmuar, lokalizuar, kapur dhe çuar para drejtësisë, shtetasin e shpallur në kërkim kombëtar dhe ndërkombëtar”, deklaroi Policia e Shtetit.
