Ministri i Punëve të Brendshme, Xhelal Sveçla bëri të ditur se Policia e Kosovës ka zbuluar një sasi të madhe armatimi në veri.
Sipas tij, aksioni u krye në Zveçan, një komunë me shumicë serbe në veri. Gjatë aksionit u bastis një shtëpi, që sipas Sveçlës përdorej si bazë për armatimin e veriut të Kosovës.
“Kjo shtëpi është përdorur për grumbullim dhe shpërndarje të armatimit për grupet kriminale serbe”, -tha Sveçla.
Më tej ai shtoi se në aksionin e Policisë së Kosovës u gjetën armë automatike, fishekë, granata dore dhe eksplozivë.
“Në vendin e ngjarjes, përveç institucioneve të sigurisë, kanë qenë të pranishëm edhe përfaqësues të KFOR-it”,-tha Sveçla . Ai shtoi se “veriu hap pas hapi po shkon drejt normalitetit”.
Ndërkaq, zëvendësdrejtori i Policisë për rajonin e Veriut, Veton Elshani, i tha Radios ‘Evropa e Lirë’ se autoritetet gjetën edhe granata dore, municion, gëzhoja kallashnikovi dhe pajisje të tjera.
Elshani po ashtu konfirmoi se nuk është arrestuar askush, por ka të dyshuar. Për ngjarjen Policia e Kosovës doli në deklaratë në orën 15:00.
Kjo nuk është hera e parë që autoritetet e rendit kryejnë aksione kundër kontrabandës në veri.
Rasti i fundit ishte në gusht, kur Policia e Kosovës kishte konfiskuar mbi 1.200 fishekë në fshatin Rudine të Zveçanit.
