Newszone.al mëson ekskluzivisht se avokati Alban Bengasi ka bërë marrëveshje me SPAK. Mbërritja e tij në aeroportin e Rinasit nuk ishte e papritur dhe as lëvizje naive.
Burime për Newszone.al, bëjnë me dije se Bengasi është vetëdorëzuar në zyrën e Interpol në Dubai dhe dje ka mbërritur në Rinas, ku i janë vënë prangat.
Një javë më parë, Bengasi i bëri një kërkesë SPAK për heqjen e kërkimit ndërkombëtar që e lejonte atë të kthehej nga Dubai në Shqipëri, kërkesë kjo që iu pranua.
Dyshohet se Bengasi mund të bëhet i penduar i drejtësisë.
“Duke qenë se shtetasi Alban Bengasi është rezident në shtetin e Dubait prej datës 07.06.2022 dhe i pajisur me ID Number 784-1973-2683597-8 nga ky shtet, ky shtetas kërkon të vetëdorëzohet pranë autoriteteve shqiptare për tu vënë në dispozicion të Institucioneve të Drejtësisë si SPAK dhe GJKKO për tu përballur me procedurat hetimore dhe gjyqësore në ngarkimin e tij për çfarë ai dyshohet. Për këtë vetëdorëzim kemi njoftuar edhe Ambasadën Shqiptare ne Emiratet e Bashkuara Arabe. Por për t’u bërë e mundur ardhja e tij nga shteti i Dubait për në shtetin shqiptar kërkojmë nga ana juaj të pezulloni kërkimin ndërkombëtar për këtë shtetas vetëm për qëllim që ai të mund të udhëtojë nga Dubai për në Shqipëri, në ditën dhe orët që do të vendosni ju. E bëjmë këtë kërkesë pasi midis shtetit Shqiptar dhe atij të Dubait nuk ka marrëveshje ekstradimi midis këtyre dy vendeve. Kërkojë që kjo kërkesë te trajtohet në mënyrë sa më të shpejtë nga ana juaj duke komunikuar me Interpol Tirana për farë ne kërkuam më sipër duke bërë anulimin e kërkimit ndërkombëtar të përkohshëm për këtë shtetas për qëllimin e vetëdorëzimit dhe transportit nga Dubai për në Shqipëri të personit nën hetim Alban Bengasi. Ju faleminderit”, shkruhet në kërkesë.
Porositi Dumanin t’i vriste gruan
Mbi dyshimet se gruaja e tij e tradhtonte me shokun e ngushtë, ai i ofroi 120 mijë euro Dumanit për ta vrarë. Ngjarja u zbardh pas dëshmisë së dhënë për SPAK nga i penduari i drejtësisë, i cili rrëfeu se fillimisht Bengasi kishte kërkuar që gruaja e tij Blerta të dhunohej, t’i shkaktoheshin dëme të shumta e më pas të vritej.
Gruaja u mbajt në vëzhgim për disa ditë në zonën e Kodrës së Diellit në Tiranë, aty ku kishte shtëpinë. Bashkëpunëtori i Dumanit, Eljo Bitri, e qëlloi disa herë me sende të forta bashkëshorten e Bengasit, ndërsa avokati shprehu pakënaqësinë që ish-bashkëshortja e tij nuk ishte dhunuar ashtu siç ai vetë kishte kërkuar.
Më tej, Bengasi i ofroi shumën 120 mijë euro Nuredin Dumanit për ta eleminuar, shumë që sipas bashkëpunëtorit të drejtësisë ishte e pamjaftueshme për vrasjen e një gruaje. Dumani, i konsideruar një nga personazhet më të kërkuar të botës së krimit, u arrestua në Fier në mars të vitit 2022, pas një tentative të dështuar për të vrarë Talo Çelën. Bashkë me të, në pranga ra dhe Henrik Hoxhaj, i cili e ndihmoi në arratinë e shkurtër.
Dëshmitë e tyre dhe provat e gjetura në telefonin e Dumanit që mbeti i plagosur në përballjen me Talo Çelën, ndihmuan SPAK në zbërthimin e grupeve kriminale dhe një sërë vrasjesh që nga viti 2011 deri në 2022.
