Shpërndanin drogë në një festival në Dhërmi, arrestohen 4 persona

Policia e Dhërmiut ka vënë në pranga 4 persona për drogë. Sipas njoftimit të Policisë, personat në fjalë, tre shqiptarë të Kosovës dhe një gjerman, u arrestuan pasi u kapën në flagrancë duke shitur doza të llojeve të ndryshme drogërash gjatë një festivali që po mbahej në Dhërmi. Pas marrjes së informacionit, ‘Blutë’ kanë ndërhyrë në perimetrin ku po zhvillohej festivali duke arrestuar të 4 personat të identifikuar si: Altin Boshnjaku, Art Behjtullahu, Arten Preveza, David Neumann. Shtetasit siguronin droga të ndryshme duke I ndarë ato në doza të cilat i shitnin te turistët dhe pushuesit, të cilët po ndiqnin një festival të organizuar në Dhërmi. Pas operacionit Policia sekuestroi  doza dhe tableta të lëndëve narkotike kokainë, MDMA dhe ekstazi, 151 qese farmaceutike dhe peshore elektronike që shërbenin për ndarjen e lëndëve narkotike, në doza, 4250 euro dhe 101 900 lekë, një automjet, 4 celularë dhe një kartëmonedhë 20 euro false.