Në qendrën hapësinore në Rusinë Lindore kanë filluar bisedimet dypalëshe midis presidentit rus Vladimir Putin dhe liderit të Koresë së Veriut Kim Jong Un.
Ky i fundit iu drejtua Putinit duke i thënë se Rusia po bën një luftë të shenjtë me Perëndimin dhe se të dy vendet do të luftojnë së bashku imperializmin. Deklarata e tij:
“Rusia po bën një betejë të shenjtë për të mbrojtur sovranitetin dhe sigurinë e saj kundër fuqive hegjemoniste. Ne do të mbështesim gjithmonë vendimet e Presidentit Putin dhe udhëheqjes ruse, dhe do të jemi së bashku në luftën kundër imperializmit”.
Para fillimit të bisedimeve, Putin uroi Kim për 75 vjetorin e themelimit të Koresë së Veriut në 1948 dhe premtoi të ndihmonte Korenë e Veriut në prodhimin e satelitëve. Kim mbërriti me tren në Vostochny, i cili ndodhet midis pyjeve të Rusisë lindore, jo shumë larg kufirit me Kinën.
