Presidenti i Turqisë, Recep Tayyip Erdogan, ka akuzuar Bashkimin Evropian se po distancohet nga Turqia, ndonëse kishte marrë një premtim nga Brukseli se bisedimet për anëtarësim do të ringjalleshin, në këmbim të heqjes së bllokadës së Ankarasë për pranimin e Suedisë në NATO.
Komisionari i BE-së për Zgjerim, Oliver Varhelyi gjatë vizitës së tij në Turqi tha se blloku evropian kërkonte të shihte veprime të Turqisë sa i përket çështjes së të drejtave të njeriut para se të rinisin bisedimet.
Por këto deklarata për Erdogan lexohen si distancim.
“BE po përpiqet të shkëputet nga Turqia. Ne do të bëjmë vlerësimet tona ndaj këtyre zhvillimeve dhe nëse është e nevojshme, mund të ndahemi me BE-në”, u tha Erdogan gazetarëve përpara një udhëtimi në Shtetet e Bashkuara.
Turqia ka qenë një kandidat zyrtar për t’u bashkuar me BE-ne për 24 vite, por bisedimet e pranimit kanë ngecur vitet e fundit për shqetësimet e bllokut për shkeljet e të drejtave të njeriut dhe respektimin e shtetit të së drejtës.
/ Newszone
