Këtë të hënë të 18 shtatorit në Apelin e Posaçëm po zhvillohet seanca gjyqësore ndaj kryebashkiakut të arrestuar të Himarës, Fredi Beleri, i cili akuzohet për blerje votash.
Beleri në këtë seanca ka kërkuar ndryshimin e masës së sigurisë dhënë më herët “arrest me burg”.
E pranishme në Gjykatë është edhe ambasadorja greke, Kostandina Kamitsi.
Vetë Belerin ndërkaq, më 15 shtator, e ka takuar edhe ministri grek i Mbrojtjes së Qytetarit, Yiannis Oikonomou, i cili po ashtu ka kërkuar lejimi i menjëhershëm për betimin e tij në krye të bashkisë jugore.
“U takova sot në burgjet e Durrësit, në prani të ambasadores tonë në Shqipëri, Konstantinas Kamitsi, me kryetarin e zgjedhur të Bashkisë së Himarës, anëtar i minoritetit etnik grek të Shqipërisë, Fredi Beleri, i cili qëndron në paraburgim për më shumë se katër muaj. Për Greqinë ky rast ka qenë që në fillim dhe mbetet tejet serioz. Respektimi i shtetit të së drejtës dhe i të drejtave politike janë parimet dhe vlerat kryesore evropiane”, shkroi ministri grek, lidhur me takimin.
