Situata e përshkallëzuar në Veri të Kosovës ka sjellë edhe reagimin e opozitës shqiptare.
Kryetari i Partisë Demokratike, Lulzim Basha ka dënuar sulmin me armë në veri të Kosovës, ku mbeti i vrarë një efektiv, ndërsa dy të tjerë u plagosen.
Basha kërkon nga Beogradi që të dënojë këtë sulm të rëndë, ndërsa thekson se në këto çaste kritike të betejës kundër krimit “jemi në krah të policisë së Kosovës”.
“I tronditur nga vrasja e punonjësit të Policisë së Kosovës dhe plagosja e një tjetër punonjësi ne Leposaviq. Mendimet dhe lutjet e mija janë me familjarët dhe kolegët e punonjësit që humbi jetën në krye të detyrës si dhe për daljen nga rreziku e shërimin e kolegut të tij të plagosur.
Në këtë çast kritik të betejës kundër krimit jemi në krah të punonjësve të Policisë së Kosovës dhe autoriteteve të vendit teksa punojnë për vënien e autorëve të kësaj ngjarje të rëndë para ligjit. Ju bëj thirrje autoriteteve të Beogradit të dënojnë dhe të distancohen prerazi nga kjo ngjarje e rëndë dhe nga gjuha e aktet destabilizuese”, shkruan Lulzim Basha.
Me anë të një postimi në Facebook, Meta thekson se kjo ngjarje e rëndë dhe e përsëritur tregon domosdoshmërinë e sundimit të ligjit.
“Partia e Lirisë dënon sulmin kriminal ndaj Policisë së Kosovës në Leposaviç me pasojë vrasjen e një punonjësi policie dhe plagosjen e një tjetri. Kjo ngjarje e rëndë dhe e përsëritur tregon domosdoshmërinë e sundimit të ligjit”, shkruan Meta, i cili thekson se “mbështet Policinë dhe autoritetet e Kosovës për të garantuar sigurinë publike dhe ndëshkuar autorët e kësaj ngjarje kriminale”.
Ish-kryeministri Sali Berisha, ka reaguar ashpër ndaj sulmeve në veri të Kosovës ku u qëlluar për vdekje një efektiv policisë dhe një tjetër mbeti i plagosur, nga një grup i armatosur serb.
Në reagimin e tij, Berisha i ka shprehur ngushëllimet familjarëve të policit, ndërsa ka theksuar më tej se “ky akt i shëmtuar kriminal është frymëzuar dhe sponsorizuar nga ultranacionalistë në pushtet të Beogradit”. “Uroj që autorët e këtij akti të përballen me ligjin me të gjithë forcën e tij”, shprehet Berisha.
“Sulm terrorist në Liposaviq ndaj policisë së Kosovës. Bie në krye të detyrës një polic dhe plagoset një tjetër.
Të dashur miq,
banda kriminale serbe në Liposaviq kanë ekzekutuar me atentat një polic të Kosovës dhe plagosur një tjetër. Duke u përulur me nderim të thellë para sakrificës sublime të policit që ra në krye të detyrës dhe shprehur ngushëllimet më të ndjera familjes, miqve, të afërmve të tij, uroj shërim të shpejt të policit të plagosur dhe dënoj me forcën më të madhe këtë akt të shëmtuar kriminal, të frymëzuar dhe sponsorizuar nga ultranacionalistë në pushtet të Beogradit. Uroj që autorët e këtij akti të përballen me ligjin me të gjithë forcën e tij”, thuhet në reagimin e Berishës.
/ Newszone
