Homazhe në nder të efektivit të vrarë në Kosovë Afrim Bunjaku janë mbajtur ditën e sotme në Tiranë. Qytetarë të shumtë janë mbledhur në sheshin “Nënë Tereza”, ku me foto të efektivit hero të Kosovës kanë ndezur qirinj.
Qytetaërt te fotot e efektivit, që u vra dy ditë më parë nga forcat serbe në Kosovë, kanë vendosur dhe lule.
Ata nuk kanë ngurruar që të marrin me vete edhe flamuj të UÇK-së.
Më 24 shtatorit një pjesëtar i Policisë së Kosovës u vra dhe 3 u plagosën në përleshjet me një grup të armatosur në veri të vendit.
Rreshteri Afrim Bunjaku u vra në pritën që grupi i armatosur kishte zënë herët në mëngjes në hyrje të fshatit Banjskës në Zveçan. Gjatë shkëmbimit të zjarrit u plagosën edhe 2 policë të tjerë.
Më pas grupi i armatosur prej 30 anëtarësh u vendos në manastirin e Banjskës ku për orë të tëra, gjatë gjithë ditës së dielë u shkëmbyen të shtëna me policinë e Kosovës.
Në mbrëmje ministri i Brendshëm i Kosovës deklaroi se tre sulmues u vranë, ndërsa gjashtë persona të tjerë, që dyshohet se ishin të lidhur me ta, u arrestuan. Gjithashtu ishin sekuestruar sasi të madhe armatimi. Një terrorist i katërt u gjet i pajetë mesditën e sotme 2 km larg manastirit ku ndodhi përplasja e armatosur.
/ Newszone
