TIRANË– Kryeministri Edi Rama ka vizituar mbrëmjen e sotme shtëpitë e rindërtuara në Baldushk pas tërmetit të 26 nëntorit të vitit 2019 që la 26 familje pa shtëpi mbi kokë në këtë zonë. I shoqëruar nga kreu i bashkisë së Tiranës Erion Velkiaj Rama tha se ky është projekti i parë i rindërtimit në Europë dhe sipas kreut të qeverisë askund nuk ka ndodhur si në vendin tonë si dhe kërkoi ndjesë për vonesën. Gjatë fjalës së tij Rama tha se ndihet i lumtur që në këtë prag festash 26 familje do të kenë mundësoi të futen në shtëpi të reja për të pritur ndërrimin e viteve.
Edi Rama: Ditë e bukur për ju, më saktë një mbrëmje e bukur, kënaqësi që jam këtu. Po bëjmë përmbyllje të një pune jo të lehtë, janë bërë investime të mëdha, është vërtetë kënaqësi që përpara një viti të ri në zonën e Baldushkut përmbyllet procesi i rindërtimit. Familjet e prekura do ta festojnë në shtëpitë e tyre. Kjo tregon atë që ne jemi zotuar, të gjithë ata që humbën shtëpinë në tragjedinë e tërmetit do të rimarrin shtëpi më të forta dhe më të bukura, dhe më të mëdha. Nuk do i kenë asnjë borxh shtetit. Ky është projekti i parë i rindërtimit në Europë. Askund tjetër nuk ka ndodhur si këtu, është i pari program rindërtimi ku qytetarëve që u jepet shtëpia nuk u vendoset asnjë barrë financiare, nuk u thuhet shtëpinë do ta merrni por do paguani një kredi të butë. Këtu s’ka kredi as të fortë as të butë, shtëpitë janë tuajat, janë pronë e patundshme e familjeve, mund të bëjnë çfarë të duan me to. Realiteti i fakteve rrëzon realitetin e gjysëm të vërtetave, ky popull ushqehet nga mëngjesi deri në darkë, ekran më ekran. E tmerrshme, çdo ditë, sepse patjetër që gënjeshtra ka fuqi tërheqëse, është më e lehtë se e vërteta për t’u treguar e për të krijuar audiencë. Në fund ka rëndësi se kush është e vërteta, e vërteta e rindërtimit triumfon çdo ditë. Ja ku janë shtëpitë, kështu do triumfojë deri kur të jetë ndërtuar shtëpia e fundit. Më vjen keq që jemi me vonesë në Kombinat, nuk është rezultat i mungesës së vëmendjes, por i pengesave të panumërta që na kanë dalë përpara. Se tjetër është të ndërtosh një lagje të re në Tiranë ku ka probleme partish dhe ndryshe është ta ndërtosh lagjen këtu.
