I ftuar në emisionin “Elite Show” ka qenë lojtari i kombëtares Jasir Asani. Sulmuesi, i cili aktivizohet në Korenë e Jugut, preku shumë tema nga kombëtarja, merkato, si dhe raporti me Ernest Muçin. Asani theksoi se ai dhe Muçi do të rikthehen sërish një ditë në Superiore për të sfiduar sërish njëri-tjetrin në derbin Partizani-Tirana si në kohërat e vjetra.
Pjesë nga intervista:
“Isha edhe në Hungari, te Kisvarda. Kam bërë një sezon shumë të mirë me shumë gola, ishte sezoni i parë në Europë. Në ndeshjet eruopiane të Conference League me Kisvardën ku kemi luajtur ndaj Kairat dhe Molde kam bërë ndeshje të mira, kam shënuar edhe gol. Kisha ofertë zyrtare nga Molde pas ndeshjes, por presidenti i Kisvardës nuk më la të largohesha sepse po kaloja moment të mirë.
Trajneri Moldes mesa kisha dijeni e kishte shok Zabaletën dhe Sylvinhon dhe kanë folur që para se të vinte Sylvinho në kombëtare. Pastaj më kanë ndjekur. Është e vështirë në kombëtare kur vjen nga jashtë Europës, por gjithsesi unë i jam falenderues Silvinhos pasi pa atë dhe stafin e tij nuk do të isha në kombëtare”.
Aventura në Korenë e Jugut me Gwangju- “Që ditën e parë kur kam ardhur është shumë ndryshe nga Europa, është pak e vështirë për t’u ambientuar. Dy-tre muajt e parë ishin të vështira me kohën dhe ushqimin, ndryshimi i orarit. Njerëzit janë të dashur dhe më kanë dhënë besim, jemi në vend të tretë, kemi edhe dy ndeshje pastaj luajmë play-off për të përcaktuar se kush do të jetë kampion, duam të luajmë edhe në Championsin e Azisë”.
