Kryetari i Partisë Demokratike, Sali Berisha komentoi për herë të parë humbjen e kandidatit të “Bashkë Fitojmë”, Emri Vata, në garën e 24 shtatorit për zgjedhjen e kryetarit të ri të Bashkisë Kukës.
Në një bisedë me Adi Krastën në Syri Tv, Berisha se Partia Socialiste shpërndau para me thasë dhe se 2 mijë patronazhistë tjetërsuan votën.
“Çfarëdo që të bënte kandidati i opozitës Emri Vata ai kurrë nuk e realizonte dot fitoren. Në 2 mijë patronazhistë që janë të regjistruar në qarkun e Kukësit kanë tjetërsuar votën. Belinda Balluku dhe Taulant Balla kanë shpërndarë thasë me para 1 javë resht. Dy mënyra ka për të blerë votën. Njëra është blerja e votës dhe marrin kartën që mos votosh. Mënyra e dytë është të blen votën, të thotë do shkosh të votosh për PS dhe merr pagesën. Këtë e ndajnë në promocion të njëjtë në çdo qendër votimi. Me Edi Ramën unë garantoj çdo shqiptar që nuk do të ketë zgjedhje të lira”, tha Berisha.
Ish-kryeministri gjithashtu tha se “zgjedhje të lira me Ramën kryeministër nuk do të ketë”.
Prej më shumë se dy ditësh, lideri i opozitës nuk e kishte komentuar rezultatin e zgjedhjeve në Kukës.
Emri Vata humbi 2 mijë vota nga 14 maji, krahasuar me kandidatin Admir Sinamati, ndërsa Albert Halilaj fitoi me një diferencë të thellë prej 5600 votash.
/ Newszone
