Ish-kryeministri Sali Berisha është shprehur se humbja e kandidatit të opozitës në zgjedhjet e pjesshme për kryebashkiak në Kukës erdhi pasi PS për një javë rresht shpërndau shuma të mëdha parash.
Komentet Berisha i bëri gjatë një interviste në Syri TV, ku tha se Edi Rama do të qëndrojë në pushtet për një kohë shumë të gjatë nëse shqiptarët nuk e largojnë, pasi sipas tij, me atë në postin e kryeministrit nuk ka zgjedhje të lira.
Ai shtoi se opozita e fitoi Bashkinë e Shkodrës në 6 mars sepse atëherë grupi kriminal i Bajrave ishte në burg dhe sipas tij, Rama i liroi para këtyre zgjedhjeve.
“Kanë shpërdarë thasë me para një javë rresht. Dy mënyra ka, njëra është blerja e votës dhe marrin kartën që të mos votosh, mënyra e dytë të blen votën. Me Ramën unë garantoj çdo shqiptar që nuk do ketë zgjedhje.
Shkodrën e fituam në 6 mars sepse Bajrët në 6 mars ishin në burg. Ky i liroi nga burgu. Safet Bajri ishte në burg me Tahirin, i nxori ai të gjithë dhe ata vunë Shkodrën në terror, bashkë me Pëllumb Gjokën. Enver Bajri me 6 makina të blinduara kalon nga një qendër votimi te tjetra. Do i shfaqim, kemi filmime. Opozita në 14 maj votoi 600 mijë kundër kësaj qeverie. Rama vetëm me zarfin prej 50 mijë lekësh dërguar 600 mijë pensionistëve, blerje publike votash.
Bashkë me rritjen e rrogave ai preku mbi 800 mijë votues. Partia e Tom Doshit u rrit 240 % nga 2021 deri tani. Nëse ne nuk largojmë Ramën, të garantoj që edhe në 2045 ai po të jetë gjallë, në pushtet do të jetë”, është shprehur Berisha.
/ Newszone
